សំរាមនៅតែជាចំណោទបញ្ហាដល់ទីក្រុងភ្នំពេញ

អត្ថបទដោយ ហៀង រ័ត្ន     

 ភ្នំពេញ៖ ទីក្រុងភ្នំពេញមានការអភិវឌ្ឍន៍កាន់តែល្អប្រសើរគួរឲ្យកត់សំគាល់ 
យើងឃើញមានសំណង់អគារខ្ពស់ៗកំពុងតែដុះឡើងយ៉ាងស្កឹមស្កៃ ហើយសកម្មភាពជារៀងរាល់របស់ប្រជាជនមានការមមាញឹកក្នុងវិស័យ ពាណិជ្ជកម្ម ឧស្សាហកម្ម អប់រំ និងសេវាកម្មជាដើម។ 

លើសពីនេះទៅទៀត ទីក្រុងភ្នំពេញ បានលូតលាស់ធំធាត់ឡើង ក្លាយជាមជ្ឈមណ្ឌលយ៉ាងសកម្មខាងសេដ្ឋកិច្ច និងឧស្សាហកម្មរបស់ជាតិ។ ដូចគ្នានេះដែរ ភ្នំពេញ​ ក៏ជាមជ្ឈមណ្ឌលសន្តិសុខ នយោបាយ ការទូតនៃប្រទេសកម្ពុជា និងទេសចរណ៍ ហើយជាកន្លែង សំរាប់ប្រកួតប្រជែងខាងទីផ្សារ ពាណិជ្ជកម្ម សេដ្ឋកិច្ច ទំនាក់ទំនងការបរទេស និងនយោបាយ ។

ប៉ុន្តែអ្វីដែលជាកង្វល់ គឺការគ្រប់គ្រងកាកសំនល់សំរាម ដែលសល់ពីការប្រើប្រាស់ មិនបានត្រឹមត្រូវ ជាហេតុបង្ករឲ្យមានការប៉ះពាល់ ដល់បរិស្ថានជុំវិញ និងបំពុលបរិយាកាស។ ការធ្វើដំណើរតាមផ្លូវរបស់មនុស្ស បំពុលទឹកពេលហូរចូលទន្លេ និងសោភណ្ឌភាពក្នុងទីក្រុងត្រូវបានបាត់បង់ ហើយមានការត្អូញត្អែរពីសំណាក់ មហាជនគ្រប់ស្រទាប់វ័យ។

លោក ឡាយ ដារិទ្ធ អាយុ២៣ឆ្នាំ ជាបុគ្គលិកផ្នែក ជំនាញបរិស្ថាននៃក្រុមហ៊ុនវាយតម្លៃហេតុ ប៉ះពាល់បរិស្ថាន(SUSTINAT Green Co,LTD) បានប្រាប់ពីមូលហេតុនៃការប្រើប្រាស់សំរាម នៅទីក្រុងភ្នំពេញថា៖ « ខ្ញុំមើលឃើញថា បញ្ហាសំរាមនៅទីក្រុងភ្នំពេញ មានមូលហេតុបី សំខាន់...ទីមួយ សកម្មរបស់ប្រជាពលរដ្ឋផ្ទាល់ ដោយសារចំណេះដឹងរបស់ពួកគាត់នៅមានកម្រិត បើទោះបីជាមានកន្លែងដាក់សំរាម ក៏មិនបានដាក់ឲ្យត្រឹមត្រូវនោះទេ គឺយកទៅបោះដាក់ក្បែរ ហ្នឹងឬក៏មិនដាក់នៅកន្លែងហ្នឹងតែម្តង។ ទីពីរ ទាក់ទងទៅនឹងក្រុមហ៊ុនប្រមូលសំរាមតែម្តង គឺជាក្រុមហ៊ុន ស៊ីនទ្រីដែលជាក្រុមហ៊ុនស្វ័យតចំណុះឲ្យរដ្ឋ ឃើញថាការប្រមូលសំរាម មិនទៀងទាត់ទេ។ ជួនកាល បីថ្ងៃទៅមួយ សប្តាហ៍ទើបមកប្រមូលម្តង ហើយវាឆ្ងាយពីកន្លែងប្រមូល និងកន្លែងចាក់សំរាមដែល ស្ថិតនៅបឹងជើងឯក ឯណោះ ដែលធ្វើឲ្យពេលវេលាការប្រមូលសំរាមរបស់ក្រុមហ៊ុនមិនមានភាពទៀងទាត់។

ទីបី ទាក់ទងជាមួយបុគ្គលិក ខ្ញុំមើលឃើញថា ពួកគេប្រមូលតែសំរាមណា ដែលទុកដាក់ត្រឹមត្រូវ ចំណែកឯ សំរាមដែលនៅពាសវាលពាសកាល មិនបានប្រមូលទេ។ ខ្ញុំយល់ថា ក្រុមហ៊ុនគួរ តែបង្កើនបុគ្គលិកឲ្យច្រើនជាងនេះ ដើម្បីធ្វើការសំអាត ព្រោះក្រុមហ៊ុនជាអ្នកទទួលសិទ្ធិគ្រប់គ្រង ផ្នែកសំរាមហ្នឹង។ ទាក់ទងទៅហ្នឹងបច្ចេកទេសរបស់ក្រុមហ៊ុន គឺថាចំនួនឡានដែលដឹកសំរាម មិនអាចគ្រប់គ្រងសំរាមនៅទីក្រុងភ្នំពេញបានទេ ព្រោះជាទូទៅសំរាមនៅទីក្រុងភ្នំពេញ មានទៅដល់២ពាន់តោនក្នុងមួយថ្ងៃ ហើយចំនួនរថយន្តមានតែបីទៅបួនរយគ្រឿងតែប៉ុណ្ណោះ នេះបើតាមការស្រាវជ្រាវរបស់ខ្ញុំ ហេតុនេះទាល់តែក្រុមហ៊ុនដឹកជារៀងរាល់ថ្ងៃ ទើបអស់។ លោកបន្តថា « កន្លែងណាដែលមានសំរាម សោភណ្ឌភាពកន្លែងនោះមិនល្អឡើយ បើទាក់ទងទៅនឹងផ្ញៀវទេសចរណ៍វិញ ពួកគេមិនចង់មកកំសាន្តនោះទេ។

សំរាមបង្ករជាវីរុស បាក់តេរីផ្សេងៗ ដែលផ្តល់ផលប៉ះពាល់ដល់សុខភាពមនុស្ស ហើយវាជាផ្នែកមួយនៃ ការស្ទះលូរ ដែលបង្ករឲ្យមានទឹកជន់លិចផ្លូវនៅទីក្រុង។ លោកសំណូមពរ ដល់ប្រជាជនប្រកាន់យក នូវអាកប្បកិរិយារបស់ខ្លួនឲ្យល្អ ក្នុងការប្រើប្រាស់សំរាមត្រឹមត្រូវ ហើយក្រុមហ៊ុនត្រូវមានភាពទៀងទាត់ ក្នុងការប្រមូលសំរាមជាប្រចាំ។ មួយវិញទៀតសាលាក្រុង ខណ្ឌ និងសង្កាត់ គឺមានតួនាទីសំខាន់ ណាស់ ក្នុងការត្រួតពិនិត្យលើការប្រមូលសំរាមរបស់ក្រុមហ៊ុនស៊ីនទ្រី ហើយសំរាមនៅតាមតំបន់ សំណង់អនាធិបតេយ្យ ក្រុមហ៊ុនគួរតែមានវិធានការ ដើម្បីដោះស្រាយបញ្ហានៃការគ្រប់គ្រងសំរាម មិនបានត្រឹមត្រូវនៅតាមតំបន់នោះ។

លោក ដឺម ដាលីន អាយុ១៩ឆ្នាំ និស្សិតឆ្នាំទីមួយ ផ្នែកសីល្បៈ និងការសិក្សាអំពីពត៍មាន បានប្រាប់ថា៖ « សំរាមបណ្តាលមកពីការប្រើប្រាស់របស់ប្រជាពលរដ្ឋ មិនបានគិតគួរពីផលប៉ះពាល់នៃសំរាម ដូចជា កម្មកររោងចក្រ តែងបោះសំរាមចោលមិនបានត្រឹមត្រូវ។ ការចោលសំរាមតាមយានជំនិះផ្សេងៗ ការដាក់សំរាមមិនបានត្រឹមត្រូវ ដែលជាហេតុបង្ករឲ្យមានភាពរប៉ាត់រប៉ាយ នៅតាមផ្លូវ។ ចំណែកការដឹកជញ្ជូនសំរាមរបស់ក្រុមហ៊ុនស៊ីនទ្រី មិនមានភាពទៀងទាត់ទេ គឺបីថ្ងៃមកយកម្តង អញ្ចឹងវាធ្វើឲ្យភាយក្លិនមិនល្អដល់មនុស្ស ដែលបង្ករជាមេរោគ ហើយអាចធ្វើឲ្យខូចសោភណ្ឌភាពទីក្រុង និងអាចបង្ករឲ្យស្ទះលូរថែមទៀត។ លោកបន្តថា​​ អាជ្ញាធរដែលជាប់ពាក់ព័ន្ធ គួរមានវិធានការ គ្រប់គ្រងសំរាមឲ្យបានត្រឹមត្រូវ និងធ្វើជាព្រិតិការណ៍សំអាតបរិស្ថាននៅតាមតំបន់ នានាក្នុងទីក្រុងភ្នំពេញ។​