តើរឿងវាលពិឃាតមានសាច់រឿងរៀបរាប់ពីអ្វីទាក់ទងនឹងជីវិតអ្នកកាសែត New York Times?

Reviewed by: Roeun Vasna
 
វាលពិឃាត ឬ The Killing Fields ​​​​ ជាភាពយន្តមួយដែល​ឆ្លុះ​បញ្ចាំង​​​​​​​​ពី​​ប្រវត្តិសាស្រ្ត​ដ៏​ជូរចត់​នៃប្រទេស​កម្ពុជាក្នុង​របប​កម្ពុជាប្រជាធិបតេយ្យ។ ភាពយន្ត​នេះ​ត្រូវ​បាន​ផលិត​ឡើង​នៅ​ឆ្នាំ​១៩៨៤ ​ដោយ​ផ្អែក​តាម​រឿង​រ៉ាវពិត​របស់​អ្នក​កាសែត​​ជនជាតិ​អាមេរិច​​ឈ្មោះ Sydney Schanberg  ដែល​បាន​ចុះ​ផ្សាយ​លើ​កាសែត​ The New York Time។

ខុសពីភាពយន្តទូទៅរបស់ Holllywood ដែលជារឿងប្រឌិត ភាពយន្ត​នេះ​បង្ហាញពី​បទ​ពិសោធន៍​ពិតរបស់ លោក Sydney Schanberg  ដែលជាកាសែត​ The New York Time និង អ្នកបកប្រែឈ្មោះ ឌិត ប្រាណ ដែលជា​អ្នក​កាសែត​ជនជាតិ​ខ្មែរ។ រឿងនេះផលិតដោយក្រុមហ៊ុនGoldcrest Films ដែលមានRoland Jofféជាអ្នកដឹកនាំរឿង និង​ David Puttnamផលិតករ។ តួអង្គសំខាន់ៗ មាន Sydney Schanberg  សម្ដែងដោយ Sam Waterston ឌិត ប្រាណ សម្ដែងដោយ លោក ហ៊ឹង សំណាងង៉ោ និង មិត្ត​រួម​អាជីពរ​បស់ពួកគេ  ដូចជា AI Rockoff ជា​អ្នកថតរូបជនជាតិអាមេរិច និង អ្នក​កាសែត​អង់គ្លេស​ឈ្មោះ Jon Swain​ ជាដើម។

មានរយៈពេល ២ម៉ោង និង​១៥ នាទី ភាពយន្តចាប់ផ្ដើមឡើងដោយបង្ហាញ​ទិដ្ឋភាព​នៅទីក្រុងភ្នំពេញ ក្នុង​ឆ្នាំ ១៩៧៣ ជាពេលដែល Sydney Schanberg  មក​​បំពេញ​ការងារ​នៅកម្ពុជា ហើយបានជួបនឹង ឌិត ប្រាណ។ ពេលនោះ ជា​ពេលដែលរដ្ឋាភិបាលរបស់លោក​ លន់ នល់ ​ដែលមានសហរដ្ឋអាមេរិច ជា​អ្នកគាំ​ទ្រ កំពុងធ្វើសង្គ្រាមប្រឆាំង ពួកខ្មែរ​ក្រហម​។ប្រទេសកម្ពុជាកាន់តែ​វឹកវរ​នឹង​សង្គ្រាម​ សហរដ្ឋ​អាមេរិច​បានទម្លាក់គ្រាប់​បែកទៅលើភូមិមួយ​នៅតំបន់ អ្នកលឿង។ Sydney Schanberg ព្យាយាមយ៉ាងលំបាក ដោយមានជំនួយពី ឌិត ប្រាណ ដើម្បី​ចេញពីភ្នំពេញ​ទៅ​ទីនោះ ដើម្បីរាយ​ការណ៍ព័ត៌មាន។

ស្ថានភាព​កាន់​តែ​​អាក្រក់ៗ​ទៅ សហរដ្ឋ​អាមេរិច​បានដកទូត និង បញ្ជួន​ទ័ព​ត្រឡប់​ទៅ​ប្រទេស​​ខ្លួន​​វិញ​។ គ្រួសារ​របស់ ឌិត ប្រាណ បាន​ភៀស​ខ្លួន​ទៅ​អាមេរិច​តាម​ឧទ្ធម្ភាគចក្រ​ តែ​ ឌិត ប្រាណ មិន​បានចេញ​ទៅជាមួយ ពួកគេទេ ព្រោះ​លោក​ចង់​នៅ​រាយ​កាណ៍អំពី​ប្រទេស​​​កម្ពុជា។ មិន​យូរប៉ុន្មាន ពួកខ្មែរ​ក្រហម បាន​ចូលមក​កាន់​កាប់​ទីក្រុង​ភ្នំពេញ ហើយ​ Sydney  Rockoff និង Swain​ ត្រូវ​ពួក​ខ្មែរ​ក្រហម​ចាប់ខ្លួន​និង​​រៀប​​នឹង​​សម្លាប់​​ចោល។ តែ​​ដោយការបញ្ចុះបញ្ចូល​របស់ ឌិត ប្រាណ ពួកគេ​​ត្រូវបាន​ដោះលែង​។ បន្ទាប់មក​ពួកគេ នាំ​គ្នា​ទៅ​ស្នាក់នៅ​ក្នុង​ស្ថាន​ទូត​បារាំង រួចធ្វើ​ដំណើរ​​ទៅ​ប្រទេស​ថៃមុននឹងទៅអាមេរិច លើកលែងតែ ឌិត ប្រាណ ម្នាក់​គត់​ដែល​គ្មាន​លិខិត​ឆ្លងដែន​។ ប្រាណ ត្រូវរស់នៅក្នុង របប​កម្ពុជា​ប្រជាធិបតេយ្យ​​យ៉ាង​លំបាកវេទនា រួចក៍ភៀសខ្លួនទៅ​ប្រទេស​ថៃ បន្ទាប់មក​ទៅរស់សហរដ្ឋអាមេរិច។

ភាពយន្តនេះប្រើវិធីពណ៌នា បែបបុរសទី១ផង និង បែប​បុរស​ទី៣ផង។ នៅពេល​ចាប់ផ្ដើមដំបូង Sydney  បានរៀបរាប់ដោយប្រើពាក្យ “ខ្ញុំ” ដើម្បីប្រាប់ពី​រឿងរ៉ាវដល់អ្នកទស្សនា តែ​ក្រោយ​មក​សាច់​រឿងទាំង​មូល​ត្រូវ​បង្ហាញ​តាម​សកម្មភាព​​​​និង​ការ​សន្ទនា​របស់តួអង្គជំនួសវិញ។ ភាសា​អង់គ្លេស​ត្រូវបាន​ប្រើក្នុងការសន្ទនារបស់តួអង្គសំខាន់ ចំណែកភាសាខ្មែរត្រួវបានប្រើ​សម្រាប់​តួអង្គ​ដែល​សម្ដែង​ជា​ជនជាតិ​ខ្មែរ។

សាច់រឿងទាំងមូលបង្ហាញតាមរយៈ Point of view របស់តួអង្គពីនាក់គឺ Sydney  និង ឌិត ប្រាណ។ ផ្ទៃរឿងដំបូងមានលក្ខណៈ action  dramatic រួមផ្សំ និង ភាព សោកសៅ។ដូចត្រង់ឈុត ​ក្នុងភូមិក្រោយពេលទម្លាក់គ្រាប់បែក និង ការ​ចូល​មក​កាន់​​កាប់​ទីក្រុងភ្នំពេញរបស់ពួកខ្មែរក្រហមជាឧទាហរណ៍។

ហួសពីពាក់កណ្ដាលសាច់រឿងបន្តិចសាច់រឿងរបស់ ឌិត ប្រាណ ដែលបង្ហាញពីភាពអត់ឃ្លាន កាសម្លាប់រង្គាល និង សោដនាកម្មជាច្រើន ក្នុងរបប​ខ្មែរ​ក្រហម។ មួយផ្នែកទៀតជាទិដ្ឋភាព នៅទីក្រុង New York ដែលជា Point of View របស់ Sydney។

ភាពយន្តបញ្ចប់ត្រង់ឈុត ដែល ឌិត ប្រាណ បានជួបនឹង Sydney ​ ក្នុងជំរុំមួយក្នុងទឹកដីប្រទេសថៃ។ Sydney បានឈ្នះពានរង្វាន់ចំពោះការ​រាយការណ៍ពីសង្គ្រាមស៊ីវិលនៅកម្ពុជា ចំណែក ឌិត ប្រាណ ទៅរស់នៅអាមេរិច​ហើយ​ធ្វើ​ជា​អ្នក​ថតរូបឲ្យកាសែត The New York Time។

តាមរយៈភាពយន្តនេះអ្នកទស្សនាអាចស្វែងយល់យ៉ាងច្រើន​អំពី​ស្ថាន​ភាព​នៃប្រទេសកម្ពុជាក្នុងសម័យកាលនោះជាពិសេស ទុក្ខវេទនារបស់ប្រជាជនខ្មែរ​ក្នុងរបបខ្មែរក្រហម​។

The Killing Fields បាន​ទទួលពានរង្វាន់លំដាប់​ថ្នាក់​អន្តរជាតិ​ជាច្រើន​ដូចជា​៖ ភាពយន្ត​ល្អ​បំផុត​របស់​ British Academy Film Awards និង ជា​ភាពយន្ត​ដែល​មានសម្លេង និងរូបភាព​ល្អបំផុតរ​បស់ Golden Globe Awards​ជាដើម។ ចំណែក លោក ហ៊ឹង សំណាងង៉ោ បានក្លាយ​ជនជាតិ​អាស៊ីទីមួយ ដែល​ទទួល​ទទួល​ពានរង្វាន់​ជា Best Supporting Actor របស់ Oscar៕