ការងារជាអ្នកកាសែតស្រីមានអ្វីទៅលំបាកដូចមតិខ្លះតែងនិយាយនោះ!
ដោយ៖ ហៀង រ័ត្ន
ជាកូនពៅនៃគ្រួសារ ដែលមានបងប្អូនស្រីពីរនាក់ ក្រោមការទំនុកបម្រុងពីអ្នកម្តាយ កញ្ញា ញឹក ស្រីល័ក្ខ ដែលបច្ចុប្បន្នមានវ័យ២០ឆ្នាំ កើតនៅក្នុងគ្រួសារមួយដែលមានជីវភាពសមរម្យនៅរាជធានីភ្នំពេញ។ កាលពីវ័យកុមារ ស្រីល័ក្ខបានសិក្សានៅសាលាបឋមសិក្សាសាមគ្គី ក្នុងសង្កាត់គោកឃ្លាង រាជធានីភ្នំពេញ និងបានបន្តសិក្សាថ្នាក់វិទ្យាល័យនៅវិទ្យាល័យសម្តេចហ៊ុន សែន
ភ្នំពេញថ្មី ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
ក្រោយពីបានបញ្ចប់សញ្ញាបត្រមធ្យមសិក្សាទុតិយភូមិ២០១៥ កញ្ញា ញឹក ស្រីល័ក្ខ បានសិក្សាបន្តនៅសាកលវិទ្យាល័យកម្ពុជា ដោយជ្រើសរើសជំនាញ សិល្បៈ និងការសិក្សាអំពីព័ត៍មាន។ មុននឹងជ្រើសរើសយកជំនាញមួយដែលទាក់ទងទៅនឹងប្រព័ន្ធផ្សព្វផ្សាយព័ត៍មាន គឺគ្រួសារមិនគាំទ្រកញ្ញាឡើយ ដោយសារវាជាការងារមួយដែលពិបាកសម្រាប់រូបនាងជាមនុស្សស្រី។
បច្ចុប្បន្ន កញ្ញា ញឹក ស្រីល័ក្ខជានិស្សិតឆ្នាំទី៣នៃសាកលវិទ្យាល័យកម្ពុជានៃមហាវិទ្យាល័យព័ត៍មាន និងគមនាគមន៍ ហើយកញ្ញា ក៏កំពុងតែបម្រើការងារក្រៅម៉ោងអ្នកសារព័ត៍មាននៅស្ថាប័នសារព័ត៍មានមួយនៅកម្ពជាផងដែរ។ រួមផ្សំជាមួយនឹងទេពកោសល្យ ចំណង់ចំណូលចិត្ត បានធ្វើឲ្យនិស្សិតស្រីរូបនេះបានអភិវឌ្ឍខ្លួនឯងបានយ៉ាងល្អ
ជាមួយការងារដែលត្រូវនឹងជំនាញរបស់ខ្លួនកំពុងសិក្សា។
រៀនផងធ្វើការផង គឺជាផលវិបាករបស់និស្សិតម្នាក់ៗ បើទោះបីខ្លូនជាស្រី តែកញ្ញាមិនដែលបោះបង់ឡើយជាមួយនឹងការងារនេះ ព្រោះវាបានផ្តល់ឲ្យយើងនូវអត្ថប្រយោជន៍នៃបទពិសោធន៍ពីការងារយ៉ាងច្រើន ដែលបានអនុវត្តផ្ទាល់ពីការងារ។
ទើបវតែជានិស្សិតសោះ តែក៏មានការងារដែលសាកសមមួយសម្រាប់ខ្លួនទៅហើយ
ហើយក៏អាចផ្គត់ផ្គង់ខ្លួនឯងបាន។ ការងារជាអ្នកកាសែត គឺជាការងារដែលកញ្ញាចង់ធ្វើ តែអ្វីដែលលើសពីនេះ
គឺស្រីល័ក្ខ ចង់វិវត្តខ្លួនឲ្យលើសពីអ្នកកាសែតតែម្តង។ កញ្ញាមានក្តីបំណងនៅ
១០ ឆ្នាំខាងមុខទៀត គឺកញ្ញា មិនត្រឹមតែចង់ក្លាយជាអ្នកកាសែតមួយមុខនោះទេ គឺចង់វិវត្តខ្លួនឲ្យក្លាយជាអ្នកកាសែតស្រីម្នាក់ដែលចេះគ្រប់មុខជំនាញនៅក្នុងប្រព័ន្ធផ្សព្វផ្សាយ។ កញ្ញា មើលឃើញថា
ប្រព័ន្ធផ្សព្វផ្សាយមិនមែនផ្តោតទៅលើការងារជាអ្នកកាសែតតែមួយមុខនោះទេ មានទាំងការទំនាក់ទំនង និងតួនាទីផ្សេងៗ។
ជាគោលដៅក្នុងរយៈពេល ១០ ឆ្នាំខាងមុខ កញ្ញាចង់ក្លាយទៅជាផលិតករនៅក្នុងវិស័យសារព័ត៍មាន
ឬក៏បុគ្គល ដែល មានតួនាទីធំៗនៅក្នុងប្រព័ន្ធផ្សព្វផ្សាយសង្គម។
Comments
Post a Comment