ការនេសាទខុសច្បាប់
ការនេសាទត្រី ក៏ជាវិស័យជលផលមួយដ៏សំខាន់នៅប្រទេស កម្ពុជា និងមានសារៈសំខាន់សម្រាប់សេដ្ឋកិច្ចប្រទេសផងដែរ។ ម៉្យាងវិញទៀត មានបងប្អូនខ្មែរ និងខ្មែរ-អីស្លាមជាច្រើនរស់នៅជុំវិញតំបន់ទន្លេរសាប ហើយភាគច្រើន ពួកគាត់ប្រកបរបរចិញ្ចឹមជីវិតដោយការចេញទៅនេសាទនៅតាមដងទន្លេរ។ សម្រាប់ត្រីដែលរកបានពីការនេសាទ ពួកគាត់ទុកបរិភោគខ្លះ សេះសល់យកទៅលក់នៅទីផ្សារដើម្បីទទួលបានកំរៃខ្លះយកមកផ្គត់ផ្គង់ជីវភាពគ្រួសារ។
ដោយឡែក
ប៉ុន្មានឆ្នាំចុងក្រោយនេះ ទិន្នផលត្រីមានការធ្លាក់ចុះជាបន្តបន្ទាប់ ដោយសារកត្តា
អាកាសធាតុមានការប្រែប្រួល កម្រិតទឹកកាន់តែរាក់ពីមួយឆ្នាំទៅមួយឆ្នាំ បូករួមទាំងការនេសាទខុសច្បាប់របស់ប្រជាពលរដ្ឋ
តាមបណ្តារខេត្តមួយចំនួន។
ជាក់ស្ដែង នៅក្នុងតំបន់មួយនៃខេត្ត កំពង់ចាម តាមបណ្តោយដងទន្លេរសាបស្ថិតក្នុងភូមិ ល្វាលើ ឃុំ ស្តៅ ស្រុក កងមាស ក៏កំពុងមានបញ្ហាប្រឈមនឹង «ការនេសាទខុសច្បាប់» ផងដែរ នេះបើយោងទៅតាមកិច្ចសម្ភាសន៍ជាមួយលោកអ៊ុំ ប៊ុន យ៉ុន ដែលជាប្រធានសហគមន៍នៅក្នុងតំបន់នោះ។
លោកអ៊ុំបានរៀបរាប់មកកាន់ និស្សិតសារព័ត៌មាន នៃមហាវិទ្យាល័យព័ត៌មាន និងគមនាគមន៍ ថា «នៅតាមបណ្ដោយដងទន្លេ ក្នុងភូមិល្វាលើនេះ មានអ្នកនេសាទមួយចំនួននៅតែបន្តប្រព្រឹត្តការនេសាទខុសច្បាប់ ដោយមិនបានគិតពីផលប៉ះពាល់ និងការហិនហោចនៃធនធានត្រីនៅទីនោះ បូករួមទាំងកម្រិតទឹកទាប កាន់តែធ្វើឲ្យទិន្នផលត្រីក៏កាន់តែធ្លាក់ចុះ»។
ក្នុងនោះ ប្រធានសហគមន៍រូបនេះ បានបន្តទៀតថា ប្រជាជនដែលនេសាទខុសច្បាប់នោះ គឺប្រព្រឹត្រទៅតាមរូបភាព និងការប្រើប្រាស់ឧបករណ៍ដូចជា ការនេសាទដោយប្រើសៃ ប្រើសមួយរយ និងការឆក់ជាដើម។ ជាមួយគ្នានោះ លោក ក៏បានបន្ថែមទៀតថា ប្រជាពលរដ្ឋ នៅក្នុងតំបន់នោះ មានការត្អូញត្អែលចំពោះបញ្ហានេះ ដោយសារតែពួកគេទទួលរងផលប៉ះពាល់ ដោយសារតម្លៃត្រីកាន់តែថ្លៃជាងរាល់ឆ្នាំ ហើយត្រីភាគច្រើនដែលដាក់លក់នៅក្នុងផ្សារសុទ្ធសឹងតែនាំចូលពីខាងក្រៅមកវិញ។
បើតាមការបន្ថែមពីលោកអ៊ុំ យ៉ុន គាត់បានរៀបរាប់បន្តទៀតថា បងប្អូនជាអ្នកនេសាទខុសច្បាប់នៅម្តុំមាត់ទន្លេរ ភាគច្រើនយកត្រីទាំងអស់ទៅលក់ឱ្យឈ្មួញដែលនៅចាំទិញបន្ត សម្រាប់ប្រភេទត្រីធំៗគេយកទៅលក់ឱ្យក្រុមឈ្មួញដែលនៅចាំទិញនៅលើច្រាំង ចំណែកកូនត្រីតូចៗលាយឡំជាមួយនឹងកូនកំពឹស កូនក្តាម កូនអន្ទង់ជាច្រើនក្បាល ត្រូវបានយកមកធ្វើជាណុយសម្រាប់ត្រីចិញ្ចឹម។
កន្លងមក ខាងសមត្ថិកិច្ចជនផលក៏បានអនុវត្តច្បាប់មួយចំនួនទៅលើ ក្រុមអ្នកនេសាទខុសច្បាប់ជាច្រើនលើកមកហើយ ប៉ុន្តែ ហាក់ពុំទទួលបានលទ្ធផលល្អនោះទេ យ៉ាងច្រើនពួកអ្នកនេសាទទាំងនោះផ្អាកបានត្រឹមរយៈពេលខ្លីប៉ុនណោះ។ មកទល់ពេលនេះ ខាងអាជ្ញាធរប្រចាំស្រុក កងមាស ខេត្ត កំពង់ចាម មិនទាន់មានវិធានការប្រសិទ្ធិភាពណាមួយ ដើម្បីមកទប់ទល់នឹងការនេសាទខុសច្បាប់នៅឡើយទេ។
ជាចុងក្រោយ
លោកអ៊ុំ យ៉ុន បានអំពាវនាវ ដល់ខាងរដ្ឋាភិបាល ក៏ដូចជាអាជ្ញាធរធំៗប្រចាំខេត្ត
កំពង់ចាម លើកយកវិធានការណាមួយយកមកទប់ស្កាត់អំពើខុសច្បាប់នេះ ឱ្យទាន់ពេលវេលា
កុំឱ្យធនធានត្រីក្នុងទន្លេរកាន់តែហិនហោចទៅៗ ពីមួយឆ្នាំទៅមួយឆ្នាំ៕
Comments
Post a Comment