ដំណើរទស្សនកិច្ចសិក្សានៃនិស្សិតមហាវិទ្យាល័យព័ត៌មាន និង គមនាគមន៍
កាលពីថ្ងៃទី ០៥ ខែ ធ្នូ ឆ្នាំ ២០១៧ និស្សិតជំនាន់ទីមួយនៃមហាវិទ្យាល័យព័ត៌មាន និង គមនាគមន៍បានធ្វើដំណើរទស្សនកិច្ចសិក្សាទៅកាន់ស្រុក កងមាស ខេត្ត កំពង់ចាម ដើម្បីធ្វើការសិក្សាពីការចុះប្រមូលព័ត៌មានសហគមន៍។
ដំណើរទស្សនកិច្ចនេះត្រូវបានរៀបចំឡើងដោយមហាវិទ្យាល័យព័ត៌មាន
និង គមនាគមន៍នៃសាកលវិទ្យាល័យកម្ពុជា ក្នុងគោលបំណងឲ្យនិស្សិតបានចុះអនុវត្តផ្ទាល់ និង ស្វែងយល់ អំពីរបៀបនៃការសម្ភាសន៍ និង ប្រមូលព័ត៌មានក្នុងសហគមន៍។
ទីតាំងគោលដៅនៃដំណើរទស្សនកិច្ចនេះគឺឆ្ពោះទៅកាន់ មជ្ឈមណ្ឌលភាសានិងព័ត៌មានសហគមន៍ ដែលស្ថិតនៅ ភូមិស្ដាំលើ ឃុំ ស្ដៅ ស្រុក
កងមាស ខេត្ត កំពង់ចាម និង សហគមន៍ក្បែរៗនោះ។និស្សិតឆ្នាំទី៣
ជំនាញសិល្បៈ និង ការសិក្សាអំពីព័ត៌មាន ដែលបានចូលរួមក្នុងដំណើរទស្សនកិច្ចសិក្សានេះ ត្រូវបានបែងចែកជា ៥ ក្រុមដើម្បីចុះយកព័ត៌មានលើប្រធានបទចំនួន៥ខុសៗគ្នា។ ប្រធានបទទាំងនោះសុទ្ធសឹងតែជាព័ត៌មានអំពីសហគមន៍ដែលទាក់ទងនឹង វិស័យកសិកម្ម វិស័យសុខាភិបាល វិស័យអប់រំ ព្រះពុទ្ធសាសនា និង បញ្ហាបម្រែបម្រួលអាកាសធាតុជាដើម។
ដំណើរទស្សនសិក្សាកិច្ចនេះ ត្រូវបានដឹកនាំដោយលោក មឿន ឈានណារិទ្ធ ដែលជាសាស្រ្តាចារ្យផ្នែកសារព័ត៌មាន នៃសាកលវិទ្យាល័យកម្ពុជា និង ជាប្រធាននៃមជ្ឈមណ្ឌលភាសា និង ព័ត៌មានសហគមន៍ផងដែរ។
ក្រៅពីទស្សនកិច្ចសិក្សាខាងលើ
និស្សិតមហាវិទ្យាល័យយព័ត៌មាន និង គមនាគមន៍ ក៏ធ្លាប់បានទធ្វើទស្សនកិច្ចសិក្សាទៅកាន់ទីកន្លែងផ្សេងៗទៀតដូចជា ស្ថានីយន៍ទូរទស្សន៍និងវិទ្យុអាស៊ីអាគ្នយ៍
និង ឧទ្យានជាតិគិរីរម្យជាដើម៕
ដោយ៖ រឿន វាសនា
Comments
Post a Comment