ជីវិតអ្នកលក់ដូរនៅតាមផ្លូវ

( ភ្នំពេញ )  ថ្ងៃទី០៥ ធ្នូ ២០១៦

 អត្ថបទដោយ សៀង លក្ខិណា 

 លោក ពូ នួន សុផានី ជាអាជីវករម្នាក់ដែលលក់ភេសជ្ជៈនៅមុខ សកលវិទ្យាល័យ កម្ពុជា ជិត៤ឆ្នាំមកហើយ ។ លោក ពូ សុផានី មានស្រុកកំណើតនៅខេត្តកំពត ប៉ុន្តែសព្វថ្ងៃនេះគាត់បានផ្លាស់ប្តូរទីលំនៅមករស់នៅទីក្រុងភ្នំពេញ ប្រហែល ៥ ឆ្នាំ  ។​ លោកពូបានបន្ថែមទៀតថា ការមករស់នៅទីក្រុងភ្នំពេញនេះគឺគាត់បានជួលផ្ទះគេដើម្បីស្នាក់នៅ ស្ថិតនៅក្បែរ សកលវិទ្យាល័យ កម្ពុជានេះផងដែរ ដោយក្នុងមួយខែតម្លៃ ៥០$ ។ 

ជាធម្មតា លោកពូ សុផានី លក់ភេសជ្ជៈមួយថ្ងៃបានប្រាក់ប្រហែល ២៥០០០០៛ ប្រសិនបើមេឃក្តៅដូចពេលនេះ ​​​ហើយមួយថ្ងៃគាត់ចំណេញបាន ១២៥០០០៛ ប៉ុណ្ណោះ តែប្រសិនបើមេឃភ្លៀង លោកពូ រកបានប្រាក់ចំណូល២០០០០ទៅ៣០០០០៛តែប៉ុណ្ណោះ។  ការលក់ភេសជ្ជៈនេះអាចដោះស្រាយបញ្ហាជីវភាពនៅក្នុងគ្រួសាររបស់លោកពូបានមួយចំនួនផងដែរ ដោយគាត់អាចផ្គត់ផ្គង់ការសិក្សារបស់កូនៗ និងមិនធ្វើឲ្យគ្រួសារគាត់អត់ឃ្លាននោះទេ។

មូលហេតុដែលលោកពូ ផានី ជ្រើសរើសមុខរបរនេះព្រោះលោកពូ គិតថាខ្លួនគាត់រៀនមិនសូវចេះដឹងដូចគេ ដូច្នេះគាត់គ្មានសមត្ថភាពទៅធ្វើការងារល្អៗ ដូចអ្នកដែលគេមានចំណេះវិជ្ជានោះទេ ។ លោកពូ គីតថាមានតែការលក់ភេសជ្ជៈនេះទេដែឡ អាចរកបានចំណូលបានគួរសមគ្រាន់បើ សម្រាប់ការផ្គត់ផ្គង់ជីវភាពគ្រួសាររបស់គាត់បានជារៀងរាល់ថ្ងៃ ។

លោកពូ ផានី មានលក់ភេសជ្ជៈគ្រប់មុខ ដែលមានដូចជា កាហ្វេ កូកា តែជ្រក់ ដោះគោឆៅ បាកាស ទឹកសុទ្ធជាដើម។

កញ្ញា ង៉ូត ស្រីណុច ជានិស្សិតនៃ សកល វិទ្យាល័យ កម្ពុជា បាននិយាយថា នៅពេលដែលសម្រាកពីម៉ោងសិក្សា កញ្ញា តែងតែមកទិញភេសជ្ជៈលោកពូ សុផានី ជានិច្ច ព្រោះកញ្ញា គិតថា ការលក់របស់លោកពូមានតម្លៃសមរម្យ រហ័ស ហើយអ្វីដែលធ្វើអោយកញ្ញាពេញចិត្តនោះគឺភាពរួសរាយរាក់ទាក់របស់លោកពូ សុផានី ។

​​