ហេតុអ្វីបានជាសត្វប្រើសជាតួអង្គចង្រៃក្នុងរបាំត្រុដិ?
ដោយ៖ អ៊ុត រស្មី
ភ្នំពេញ: របាំត្រុដិគឺជាប្រភេទរបាំប្រពៃណីមួយដែលភាគច្រើនគេតែងតែសម្ដែងនៅរដូវបុណ្យចូលឆ្នាំថ្មីដើម្បីបណ្ដេញឧបទ្រពចង្រៃឆ្នាំចាស់ផ្លាស់ចូលឆ្នាំថ្មី។ របាំនេះគឺមានប្រភពមកពីខេត្តសៀមរាបដែលមានប្រជាប្រិយភាពនិងមានអត្ថន័យល្អផងដែរ។
របាំត្រុដិគឺជារបាំប្រពៃណីមួយបែបដែលគេនិយមសំដែងនៅរដូវចូលឆ្នាំថ្មី ព្រោះពាក្យ<<ត្រុដិ>> នេះគឺសំដៅដល់ពេលដែលឆ្នាំចាស់ដាច់ដើម្បីផ្ដាច់ចូលឆ្នាំថ្មី ហើយតាមជំនឿគេលេងរបាំត្រុដិដើម្បីបណ្ដេញឧបទ្រពចង្រៃក្នុងឆ្នាំចាស់ នឹងនាំមកនូវសេចក្ដីសុខសប្បាយប្រកបដោយសុភមង្គលសម្រាប់ឆ្នាំថ្មី។រាល់តួអង្គក្នុងរបាំត្រុដិមានទាំងអស់គឺជាតួអង្គចេញមកដើម្បីកំចាត់ឧបទ្រពចង្រៃជាមួយគ្នា។
ចំណែកឯតួអង្គដែលនាំមកនៅការចង្រៃដល់ភូមិស្រុកនោះគឺ តួអង្គសត្វប្រើសព្រោះសត្វប្រើសគឺជាសត្វព្រៃ ដោយតាមជំនឿគេជឿថាឲ្យតែមានសត្វព្រៃរត់ចូលក្នុង ភូមិស្រុករបស់គេគឺដឹងតែចង្រៃដល់ភូមិស្រុកជាមិនខាន។
នៅពេលលរបាំត្រុដិមកដល់ភ្លាមមានអ្នកច្រៀង ច្រៀងសុំកន្លែងលេងរួចហើយ គេហៅតួអង្គយក្សព្រៃដើម្បីមកជួយកំចាត់ឧបទ្រពចង្រៃ បន្ទាប់ពីតួអង្គយក្សចេញទៅក៏មានតួអង្គក្ងោកដែលតំណាងឲ្យសត្វបក្សីសួគ៍ ទន្សោង ព្រាយ ចេញមកបង្ហាញពីគោលបំណងជួយដេញស្ទាក់ប្រើសឲ្យចូលក្នុងគន្លងព្រានដើម្បីជួយព្រានឲ្យដេញបាញ់ប្រើសឲ្យបាន។
ក្រៅពីនេះក៏នៅមានតួអង្គកាន់កញ្ជែដែលតំណែងឲ្យព្រៃព្រឹក្សា អារុក្ខ អារក្ស ទេវតា អ្នកតាដែលជួយជ្រោមជ្រែងព័ទ្ធខ្ទប់ស្ទាក់ប្រើសឲ្យព្រានព្រៃបាញ់បាន។ទន្ទឹមនឹងនេះតួអង្គដែលសំខាន់នៅក្នុងរបាំត្រុដិនោះគឺតួអង្គអ្នកច្រៀង ត្រូវច្រៀងរៀបរាប់អំពីតួអង្គទាំងអស់ បើគ្នានអ្នកច្រៀងនោះទេគឺគេមិនដឹងថាតួអង្គណាចេញពីណានោះទេ។
នៅពេលដែលសំដែងចប់គឺមានអ្នកកាន់ដងដោយ ដោយដងដោយនោះគេធ្វើក្បាលដូចរាងរទេះគោក្នុងដងដោយនោះគឺមានថង់លុយ គេមានជំនឿថា ទោះមានលុយតិចក្ដី ច្រើនក្ដីក៏ត្រូវតែដាក់លុយដែល ព្រោះថាវាអាចបណ្ដេញឧបទ្រពចង្រៃឲ្យចេញឆ្ងាយនឹងនាំសេចក្ដីសុខសុភមង្គលចូលមកនូវក្នុងឆ្នាំថ្មី៕
Comments
Post a Comment