សិក្ខាសាលាស្តីពីកំណែទម្រង់អភិបាលកិច្ចបរិស្ថាននៅកម្ពុជា

អត្ថបទដោយ​ ៖ ឡោ រក្សា

ភ្នំពេញ​ ៖ ​សមាគមកម្ពុជានៃអតីតនិស្សិតអូស្រា្តលី (AAA-C ) បានរៀបចំសិក្ខាសាលាមួយដើម្បីពិភាក្សា ស្វែងរកគន្លឹះស្តីពី ស្ថានភាពបច្ចុប្បន្ន បញ្ហាប្រឈម​ដំណោះស្រាយដើម្បីសម្រេចបានការអភិវឌ្ឍន៍ ប្រកបដោយចីរភាពនៅកម្ពុជា។

សមាគមអតីតនិស្សិតកម្ពុជាពីអូស្ត្រាលីបានរៀបចំសិក្ខាសាលាស្តីពីកំណែទម្រង់អភិបាលកិច្ចបរិស្ថាន នៅកម្ពុជាក្រោមប្រធានបទ៖​ “បញ្ហាប្រឈម ដំណោះស្រាយ និងដំណើរឆ្ពោះទៅមុខ​” នៅសណ្ឋាគារ Raffles Le Royal ។​ សិក្ខាសាលានេះ មានសមាសភាពចូលរួមសរុបប្រហែល ២០០ នាក់​ រួមទាំងគណ:អធិបតី ភ្ញៀវកិត្តិយស វាគ្មិន និងសិស្សនិស្សិត​ ។

សិក្ខាសាលានេះក៏មានការអញ្ជើញចូលរួមជាអធិបតីភាពពីសំណាក់ ឯកឧត្តមបណ្ឌិត សាយ សំអាល់ រដ្ឋមន្ត្រីក្រសួងបរិស្ថាន​ ឯកឧត្តម​ វ៉េង សាខុន រដ្ឋមន្រ្តីក្រសួងកសិកម្មរុក្ខាប្រម៉ាញ់ និងនេសាទ លោកបណ្ឌិត ម៉ៅ ណារ៉ា ប្រធានក្រុមប្រឹក្សាភិបាល នៃសមាគមអតីតនិស្សិតកម្ពុជាពីអូស្ត្រាលី​ និង លោកស្រី Ruth Stewart ភារ:ធារីនៃស្ថានទូតអូស្ត្រាលីប្រចាំកម្ពុជា ។

សិក្ខាសាលានេះផងដែរត្រូវបានចែកចេញជា៣វេទិកាពិភាក្សាសំខាន់ៗ កិច្ចពិភាក្សាគនឹ្លះស្តីពី៖ ស្ថានភាពបច្ចុប្បន្ន​ បញ្ហាប្រឈម​ ដំណោះស្រាយ ដើម្បីសម្រេចបានការអភិវឌ្ឍន៍ប្រកបដោយចីរភាពនៅកម្ពុជា ដែលមានវាគ្មីនពិសេស ឯកឧត្តម​បណ្ឌិត​​​ សាយ សំអាល់ រដ្ឋមន្ត្រីក្រសួងបរិស្ថាន​ ឯកឧត្តម​ វ៉េង សាខុន រដ្ឋមន្រ្តីក្រសួងកសិកម្មរុក្ខាប្រម៉ាញ់ និងនេសាទ ។

វេទិកាពិភាក្សាទី១ក្រោមប្រធានបទ ៖ ការចូលរួមដោយពេញលេញនិងមានប្រសិទ្ធភាពពីសំណាក់ដៃគូពិភាក្សា ដែលមានការ អញ្ជើញចូលរួមជាវាគ្មីន​ដោយ​លោកស្រី ហ៊ូ​ កល្យាណ​ អ្នកតំណាងនៃអង្គការ RECOFTC លោក អ៊ុក ណាវណ្ណ អគ្គនាយករងនៃអគ្គនាយកដ្ឋានសម្រាប់សហគមន៍មូលដ្ឋាននៃក្រសួងបរិស្ថាន លោកស្រី Yumiko Kura ​នាយិកាប្រចាំប្រទេសនៃអង្គការ​World Fish កម្ពុជា​ លោកបណ្ឌិត ហេង ភក្តី​ អ្នកដឹកនាំគោលនយោបាយ នៃវិទ្យាស្ថានអភិវឌ្ឍន៍បៃតងពិភពលោក Global Green Growth ។​

 

វេទិកាពិភាក្សាទី២ក្រោមប្រធានបទ ៖​​បញ្ហាប្រឈម​ និង ដំណោះស្រាយ វាគ្មីន​ លោកបណ្ឌិត Thomas Gray​ នាយកផ្នែកវិទ្យាសាស្ត្រនិងការអភិវឌ្ឍន៍សកលនៃសម្ព័ន្ធសត្វព្រៃកម្ពុជា​ Wildlife Alliance លោកបណ្ឌិត​ កែវ​​ អូម៉ាលីស អគ្គនាយករងនៃរដ្ឋបាលព្រៃឈើ លោកបណ្ឌិត​ ភិន សុភាព នាយករងនៃសាលាជាតិកសិកម្មព្រែកលៀប លោកស្រីបណ្ឌិត Moeko Saito-Jensen ជំនាញការគោលនយោបាយ នៃអង្គការ UNDP នៅកម្ពុជា លោក​ សេង​ ប៊ុន រ៉ា​​ នាយកប្រចាំប្រទេសនៃអង្គការអភិរក្សអន្តរជាតិ​Conservation International ។

គោលបំណងនៃសិក្ខាសាលានេះគឺដើម្បីស្វែងយល់ពីផែនការមេអភិវឌ្ឍន៍ទីក្រុងភ្នំពេញ​នាពេលខាងមុខជាវេទិកាមួយ សម្រាប់អ្នកជំនាញការរៀបចំផែនការទីក្រុងដើម្បីពិភាក្សាអំពីអនាគតនៃរាជធានីភ្នំពេញ​ និងពិភាក្សាអំពីបញ្ហាប្រឈម និងដំណោះសា្រយនានាដែលមានសក្តានុពលពាក់ព័ន្ធទៅនឹងការអភិវឌ្ឍន៍ទីក្រុងភ្នំពេញជាពិសេសលើបញ្ហា​បរិស្ថាន ៕