នំក្រឡានស្រុកសូត្រនិគមន៏
បើយើងធ្វើដំណើរតាមផ្លូវជាតិលេខ 6 ហើយឆ្លងកាត់ខេត្តសៀមរាបដល់ភូមិមួយមានឈ្មោះថាភូមិ ខ្នាស់ដែលស្ថិតនៅក្នុងឃុំខ្នាស់ស្រុកសូត្រនិគមន៍នោះយើងនឹងឃើញមានគេដាក់លក់បំពង់ឬស្សីដែលមានប្រវែងប្រហែល៣០សង់ទីម៉ែត្រជាច្រើននៅតាមចញ្ចើមផ្លូវជាតិលេខ៦នេះ។
ចំពោះអ្នកដែលមិនធ្លាប់ស្គាល់ថាជាអ្វីនោះប្រាកដជាឆ្ងល់ថាតើបំពង់ឬស្សីដែលមានប្រវែងប្រហែលជា៣០សង់ទីម៉ែត្រនោះ គេដាក់លក់វាធ្វើអី្វ?
តាមពិតវាគឺជានំរបស់ខ្មែរយើងម៉្យាងដែលគេហៅថាក្រឡាន។ ក្រឡានគឺជានំមួយប្រភេទដែលមានលក្ខណៈដូចបាយដំណើប នំនេះផ្សំពីអង្ករដំណើប សណ្ដែក និងដូង លាយគ្នាច្រកក្នុងបំពង់ឬស្សីនោះ។
ចំពោះវិធីធ្វើនំនេះវិញ ជាដំបូងយើងត្រូវលាងជម្រះនិងត្រាំអង្ករដំណើបឲ្យរីកជាមុនសិនរួចយកទៅលាយជាមួយដូង សណ្ដែក និងអំបិល រួចយកទៅច្រកក្នុងបំពងឬស្សីនោះ និងយកទៅឆ្អើរ។ ក្រោយឆ្អើរបានបន្តិច គេយកវាមកសកសំបកផ្នែកខាងក្រៅនៃបំពង់ឬស្សីនេះចេញ រួចយកវាទៅឆ្អើរម្តងទៀតរហូតដល់ឆ្អិនល្អ ប្រហែលជា ៤០នាទី ទៅ ១ម៉ោង។
លោកយាយរួនដែលអ្នកលក់ក្រឡានមួយរូប បានឲ្យដឹងថា លោកយាយបានប្រកបមុខរបរលក់ក្រឡាននេះអស់រយៈពេលជាង១០ឆ្នាំមកហើយ។ហើយមុខរបរមួយនេះក៏បានធ្វើឲ្យជីវភាពរស់នៅរបស់លោកយាយប្រសើរឡើង បន្ថែមពីការងារស្រែចម្ការផងដែរ។
លោកយាយបានបន្តថា ចំពោះដើមទុនដែលចំណាយលើការធ្វើក្រឡានលក់ក្នុងមួយថ្ងៃគឺប្រហែលជា១០គីឡូ ត្រូវចំណាយខ្ទង់ថវិកាពី២០ទៅ៣០ម៉ឺនរៀល។ ចំពោះប្រាក់ចំណេញវិញគឺអាស្រ័យទៅតាមថ្ងៃ បើថ្ងៃណាលក់ដាច់បានចំណូលក៏ច្រើនដែរ គឺថ្ងៃដែលលក់ដាច់អាចលក់បានពី ៤០០ទោ ៥០០បំពង់ឯណោះ ។ ថ្ងៃដែលលក់ដាច់ជាងគេ ច្រើនថ្ងៃរដូវបុណ្យទាន ដូចជាបុណ្យចូលឆ្នាំខ្មែរ ចូលឆ្នាំសាកលនិងបុណ្យភ្ជុំបិណ្ឌជាដើម។
ចំពោះភ្ញៀវដែលទិញភាគច្រើន គឺច្រើនជាអ្នកដំណើរមកពីទីក្រុងភ្នំពេញ។បើតម្លៃវិញគឺគិតទៅតាមទំហំបំពង់ បំពងតូចមានតម្លៃ២៥០០រៀលនិងបំពង់ធំមានតម្លៃចាប់ពី ៣០០០រៀលទៅ៤០០០រៀល៕
អត្ថបទ៖ដឺម ដាលីន
Comments
Post a Comment