ការចែករំលែកបទពិសោធន៏របស់ជនជាតិអាមេរិកដើមកំណើតខ្មែរ

អត្ថបទដោយ÷​ សៅ សុខអេង

ភ្នំពេញ÷​ កិច្ច​ពិភាក្សា​ជា​មួយ​វាគ្មិន​ល្បីៗ​បី​រូប​ដែល​ជាជនជាតិអាមេរិកដើមកំណើតខ្មែរ បានមកចែករំលែក បទពិសោធន៏ការ​ រស់នៅក្នុងប្រទេស សហរដ្ឋអាមេរិកនៅ សាកលវិទ្យាល័យ​កម្ពុជានៅថ្ងៃទី២៩ ខែមិនា​ ឆ្នាំ២០១៧។ ក្រោម​ការដឹកនាំ​របស់ ​លោក​ឯកឧត្តម​បណ្ឌិត ​កៅ​ គឹមហួន​ ស្ថាបនិក​ និង​ជាសកល​វិទ្យាធិការ​នៃ​សាកល​វិទ្យាល័យ​កម្ពុជា​។​​

 

យោង​តាម​លោក​ស្រី ​Sotie​ ​Heidtភរិយារបស់លោកឯកអគ្គរដ្ឋទូតសហរដ្ឋអាមេរិក​ប្រចាំនៅ​កម្ពុជាបានប្រាប់នូវ​គន្លឹះ​  ជោគជ័យជាច្រើន និងបទពិសោធន៏របស់លោកស្រីដែលទៅរស់នៅទឹកដីសហរដ្ឋអាមេរិក​។​​​ លោកស្រីបានធ្វើការ នៅក្នុងវិស័យនានា​  រាប់ពីក្នុងអង្គការមិនមែនរដ្ឋាភិបាល ទីភ្នាក់ងារនៃរដ្ឋាភិបាលសហរដ្ឋអាមេរិក និង​ វិស័យឯកជន​ លើបញ្ហានានាជាច្រើន រាប់ពីការជួញដូរកុមារ និងមនុស្ស លទ្ធកម្ម​​ និងការងារទាក់ទងនឹងការធ្វើកុងត្រា​ ទំនាក់ទំនង​​សាធារណ: និង​ការងារផ្នែ​កទីផ្សារ។​  

 

លោកស្រីចាត់ទុកខ្លួនឯងថា ជាពលរដ្ឋនៃពិភពលោក​ ហើយបានចាប់អារម្មណ៏ខ្លាំងលើការងារស្ម័គ្រចិត្ត ដើម្បីតបស្នងទៅ​ សមាគមន៍វិញ។​ហើយលោកស្រីចង់ឲ្យប្រជាជនខ្មែរមានឪកាសបានរៀននៅសហរដ្ឋអាមេរិកនិងជាជនគំរូនៅក្នុងសង្គម។​

លោកស្រីបានបន្ថែមទៀតថា​ គន្លឹះជោគជ័យរបស់លោកស្រីគឺអាចប្រកួតប្រជែងជាមួយប្រជាជនសហរដ្ឋអាមេរិកបាន។​

លោកស្រីមិនមានការភ័យខ្លាចចំពោះការប្រកួតប្រជែងខ្លាំងពេលប្រៀបធៀបជាមួយប្រទេសដទៃនោះទេ។​ផ្ទុយទៅវិញគឺធ្វើ​ឲ្យ​​ខ្លួនឯងមានការប្រកួតប្រជែងខ្លាំង ហើយក៏បានជោគជ័យសម្រាប់ខ្លួនឯង និងត្រូវមានក្តីស្រម៉ៃដ៏ធំសម្រាប់ខ្លួនឯងផងដែរ។
 ​

លោកតំណាងរាស្រ្ត ម៉ម រ៉ាឌី និងក្រុមគ្រួសារលោកបានមករស់នៅក្នុងសហរដ្ឋអាមេរិក ក្នុងនាមជាជនភៀសខ្លូនពីសង្រ្គាម​ស៊ីវិល។ ហើយលោកជាជនសំណាងមួយរូបដែលបានរស់នៅទីនោះដោយមិនដឹងពីអ្វីទាំងអស់។ លោក​គឺជា ប្រតិភូមា្នក់ទៅ​កាន់សេតវិមាន នៅឆ្នាំ១៩៩៨ ក្នុងនាមជាសមាជិកនៃ ​City of Lowell Empowerment Zone ជា គម្រោងផ្តួចផ្តើម​របស់ក្រុង ដែលផ្តល់អំណោយថវិកាដល់មុខជំនួញថ្មីៗដែលត្រូវបានបង្កើតឡើងនៅក្នុងទីក្រុង។​

លោកបានឲ្យដឹងថា​ ប្រជាជនខ្មែរទៅរស់នៅសហរដ្ឋអាមេរិកពិតជាមានការលំបាកជាច្រើន បើសិនជាគ្មានជំនួយពីជនជាតិ​អាមេរិក។​ លោកបានប្រាប់ពីភាពជោគជ័យរបស់លោកគឺត្រូវចេះជួយខ្លួនឯងសិន ខំស្វែងយល់​ និងខិតខំរៀនឲ្យបានច្រើន​ទើបអាចជួយខ្លួនឯង និងសង្គមបាន។​ ហើយលោកថាសូមកុំភ្លេចអត្តសញ្ញាណជាតិខ្លួនឯង។​​

លោក Phatry Derek Pan ជាវាគ្មិនចុងក្រោយមានបទពិសោធន៏ជាងដប់ឆ្នាំ នៅក្នុងការអភិវឌ្ឍសហគមន៏ និងប្រព័ន្ធ​ ផ្សព្វផ្សាយតាមឌីជីថល។ លោកជាកូនពៅក្នុងចំណោមកូនទាំងប្រាំពីរនាក់។​ លោកបាននិយាយថា​ ការរស់នៅសហរដ្ឋអាមេរិក​ពិតជាមិនងាយស្រួលនោះទេ គឺតែងតែជួបប្រទះនឹងបញ្ហាជាច្រើនដូចជា អាកាសធាតុត្រជាក់ពេក ទាក់ទងនឹងវប្បធម៌ ​ពូជសាសន៏ខុសគ្នា។​​

លោកបានរៀបចំព្រឹត្តិការណ៏វប្បធម៌ធំៗ បានបង្កើតអង្គការសិល្ប:មួយ ហើយបានធ្វើជាសមាជិកនៃក្រុមប្រឹក្សាភិបាលរបស់​អង្គការសហគមន៍មួយចំនួន។​​ ពេលនេះលោកធ្វើការនៅរាជធានីភ្នំពេញ ដោយលោកបន្តគ្រប់គ្រងក្រុម  Khmerican​ ហើយជាអ្នកនិពន្ធសៀវភៅដំបូងរបស់លោក ដែលមានចំណងជើងថា Khmerican: Khmer  America Forward៕​