សាកលវិទ្យាល័យ​កម្ពុជា រៀប​ចំ​ការ​ប្រគំតន្រ្តី​ចូលឆ្នាំ​ថ្មី ដើម្បី​សប្បុរស​ធម៌

អត្ថបទដោយ៖ ញឹក ស្រីល័ក្ខ

ការសម្ដែងរបាំអប្សរានៅក្នុងកម្មវិធីបើកដំណើរការកម្មវីធីចូលឆ្នាំតន្ត្រីសប្បុរសធម៍។

ភ្នំពេញ៖ ​​កាល​ពី​ថ្ងៃ​ទី ០៣ មេសា​នេះ សភានិស្សិត​នៃ​សាកលវិទ្យាល័យ​កម្ពុជាជំនាន់ទី១១ បាន​រៀប​ចំ​កម្មវិធី​​ដើម្បី​អប​អរ​សាទរ​ ពិធី​បុណ្យចូលឆ្នាំ​ថ្មី​ប្រពៃណីជាតិ​ខ្មែរ។ ជា​ពិសេស ក្នុង​កម្ម​វិធី​នេះ ក៏​មាន​ការ​ប្រគំតន្រ្តី​ ដើម្បី​សប្បុរសធម៌​ ជួយ​ដល់​អង្គការ​ ឬ​ជន​ក្រីក្រផង​ដែរ។ ជា​មួយ​គ្នា​នេះ បាន​ចូល​រួម​ផ្សព្វផ្សាយ​សិល្បៈ​វប្បធម៌​ខ្មែរ និង​ជំរុញ​ឲ្យ​មាន​ការ​លេង​ល្បែង​ប្រជាប្រិយ​ខ្មែរ​ជា​ដើម។

នៅ​ក្នុង​បរិវេណ​សាកលវិទ្យាល័យ​កម្ពុជា ​មាន​ការ​រៀប​ចំ​កម្ម​វិធីចូលឆ្នាំ​ថ្មី ដើម្បី​​សប្បុរសធម៌ ​ដោយ​មាន​ការ​ចូល​រួម​ដ៏​ខ្ពង់ខ្ពស់​ពី​សំណាក់ឯកឧត្តម កៅ គឹមហួន ប្រតិភូអម​នាយករដ្ឋ​មន្រ្តី និង​ជា​សាកលវិទ្យាធិការនៃ​សាកលវិទ្យាល័យ​កម្ពុជា រួមទាំង​សាស្រ្តាចារ្យ​ និង​ភ្ញៀវកត្តិយស​ទាំង​អស់។ កម្ម​វិធី​នេះ ​បាន​ចាប់​ផ្ដើម​​ពី​ម៉ោង ៩​ព្រឹក ដល់​ម៉ោង ៩យប់ ដោយ​មាន​ការ​លេង​ល្បែង​ប្រជាប្រិយខ្មែរ ​ការសម្ដែង​ល្ខោន​និយាយ របាំ ការ​សម្ដែង​អាយ៉ៃ និង​ការ​ច្រៀង​កម្សាន្តពី​សំណាក់​តារាល្បី​ៗក្នុង​ព្រះរាជណាចក្រកម្ពុជា​ផង​ដែរ។ ​

សម្រាប់​កម្ម​វិធី​នេះ មាន​វត្តមាន​តារាចម្រៀង​ល្បីៗ​រួម​មាន លោក ងួន ចាន់ដេវីត កញ្ញា ទេព បូព្រឹក្ស កញ្ញា សួស វីស្សា និង​លោក មានិត រួម​ទាំង​ការសម្ដែង​របស់​និស្សិត​នៃ​សាកលវិទ្យាល័យ​កម្ពុជា​ជា​ដើម។ ដោយ​ឡែក​ក្នុង​កម្ម​វិធី​នេះ បាន​ផ្ដល់​ឱកាស​ដល់​និស្សិត​គ្រប់​រូប ឲ្យ​​បាន​លេង​ល្បែង​ប្រជាប្រិយ​ខ្មែរផងដែរ។ ដោយ​ក្នុង​នោះ មាន​ល្បែង​ប្រជាប្រិយដូចជា វាយក្អម លាក់កន្សែង ដណ្ដើម​ស្លឹក​ឈើ និង​ល្បែង​ទាញ​ព្រ័ត្រជា​ដើម។

បន្ថែម​លើសនេះ ​កម្មវិធី​នេះ​​ មាន​ការ​សម្ដែង​របាំ​ត្រុដ​ ដែល​ប្រជាជន​ខ្មែរ ស្គាល់ជា​របាំ​អបអរសាទរឆ្នាំ​ថ្មី និង​របាំ​ជូន​ពរ​ ក៏​មាន​ការសម្ដែង​នៅ​ក្នុង​សាកលវិទ្យាល័យ​កម្ពុជាផង​ដែរ​។ បើ​ទោះ​បី​ជា​កម្ម​វិធី​នេះ បាន​រៀប​ចំ​ដោយ​ក្ដី​សោមនស្សរីករាយក្ដី គេសង្កេត​ឃើញ​ថា នៅ​ជុំ​វិញ​ការ​ប្រគំតន្រ្តី ក្នុង​បរិវេណសាកលវិទ្យាល័យ​កម្ពុជា មាន​ជា​ស្ដង់​សម្រាប់លក់ផលិតផល វត្ថុអនុស្សាវរីយ និង​អាហារ​ញ៉ាំ ដែល​សុទ្ធតែធ្វើ​ឡើង​ក្នុង​ទិសដៅ​សប្បុរសធម៌។

យ៉ាង​ណាក៏ដោយ សម្រាប់​ការ​ប្រគំតន្រ្តី​នៅ​ពេលល្ងាច ក៏​មាន​ការ​ផ្ដល់​វត្ត​មាន​ដ៏ខ្ពង់ខ្ពស់ពីសំណាក់សាកលវិទ្យាធិការនៃ​សាកលវិទ្យាល័យ​កម្ពុជា​ ឯកឧត្តម កៅ គឹម​ហួន ដែល​ឯកឧត្តម​បាន​ចំណាយ​វេលា​ដ៏​មាន​តម្លៃ​សម្រាប់​កម្មវិធី​ទាំង​មូល និង​និស្សិត​នៃ​សាកលវិទ្យាល័យ​កម្ពុជា​ផង​ដែរ។ ជាពិសេស ឯកឧត្តម ក៏​បាន​ចែក​នូវ​លិខិត​សរសើរ និង​ថ្លែង​អំណរគុណ​ដល់​សិល្បករ​ដែល​បាន​ចូលរួ​ម​ការ​ងារ​សប្បុរស​ធម៌ជា​មួយ​សាកលវិទ្យាល័​យ​កម្ពុជា​ផង​ដែរ។

សូម​បញ្ជាក់​ថា សភានិស្សិត​នៃ​សាកលវិទ្យាល័យ​កម្ពុជា តែង​តែ​រៀប​ចំ​កម្ម​វិធី​អបអរសាទរចូលឆ្នាំ​ថ្មី និង​ការ​ប្រគំតន្រ្តី​ដើម្បី​សប្បុរស​ធម៌​ផងដែរ។ ទន្ទឹម​នឹង​នេះ កម្មវិធី​នេះ មាន​ការ​គាំទ្រ​ពី​សាកលវិទ្យាល័យ​កម្ពុជា និង​សហព័ន្ធ​និស្សិត​នៃ​សាកលវិទ្យាល័យ​កម្ពុជា។ ម៉្យាង​ទៀត ការ​រៀប​ចំ​កម្មវិធី​បែប​នេះ ជា​បទពិសោធន៍​ និង​ជា​ជោគជ័យ​របស់​និស្សិត​សាកលវិទ្យាល័យ​កម្ពុជា ដែល​ពួក​គេ​មាន​សមត្ថភាព និង​ហ៊ាន​លះបង់​ពេល​វេលាផ្ទាល់ខ្លួន​ក្នុង​ការ​ចូលរួម​សម្ដែង និង​ចូលរួម​រៀបចំ​កម្មវិធី​ទាំង​នេះ៕​